حضور صلی اللہ علیہ وسلم کی فرشتوں سے محبت

عنوان:	حضور صلی اللہ علیہ وسلم کی فرشتوں سے محبت
تحریر:	بنت محمد یونس

اسلام میں فرشتے اللہ تعالیٰ کی نورانی مخلوق ہیں جو ہر وقت اس کے حکم کی تعمیل میں مصروف رہتے ہیں۔ حضور اکرم صلی اللہ علیہ والہ وسلم کو نہ صرف فرشتوں سے خصوصی تعلق حاصل تھا بلکہ آپ صلی اللہ علیہ والہ وسلم ان سے محبت بھی فرماتے تھے، ان کے مقام و مرتبہ کو بیان فرماتے اور امت کو بھی ان سے محبت کی ترغیب دیتے تھے۔

قرآن مجید کی روشنی میں

فرشتوں سے محبت ایمان کا حصہ: اللہ تعالیٰ نے قرآن کریم میں فرشتوں پر ایمان لانے کو اہل ایمان کی صفات میں شمار کیا ہے۔

اٰمَنَ الرَّسُوْلُ بِمَاۤ اُنْزِلَ اِلَیْهِ مِنْ رَّبِّهٖ وَ الْمُؤْمِنُوْنَؕ-كُلٌّ اٰمَنَ بِاللّٰهِ وَ مَلٰٓىٕكَتِهٖ

ترجمہ کنز الایمان: ”رسول ایمان لایا اس پر جو اس کے رب کے پاس سے اس پر اترا اور ایمان والے، سب نے مانا اللہ تعالیٰ اور اس کے فرشتوں۔“ [البقرۃ: 285]

اس آیت مبارکہ سے واضح ہوتا ہے کہ فرشتوں پر ایمان اور ان سے قلبی تعلق رکھنا خود رسول اللہ صلی اللہ علیہ والہ وسلم کا وصف ہے۔

جو فرشتوں کا دشمن ہو وہ اللہ کا دشمن ہے: ارشاد باری تعالیٰ ہے:

مَنْ كَانَ عَدُوًّا لِّلّٰهِ وَ مَلٰٓىٕكَتِهٖ وَ رُسُلِهٖ وَ جِبْرِیْلَ وَ مِیْكٰىلَ فَاِنَّ اللّٰهَ عَدُوٌّ لِّلْكٰفِرِیْنَ

ترجمہ کنز الایمان: ”جو کوئی دشمن ہو اللہ اور اس کے فرشتوں اور اس کے رسولوں اور جبرائیل اور میکائیل کا تو اللہ دشمن ہے کافروں کا۔“ [البقرۃ: 98]

حضور صلی اللہ علیہ والہ وسلم نے اس آیت مبارکہ کے ذریعے واضح فرمایا کہ حضرت جبرائیل علیہ السلام اور دیگر فرشتوں سے دشمنی دراصل اللہ تعالیٰ سے دشمنی ہے، جو اس بات کا ثبوت ہے کہ آپ صلی اللہ علیہ والہ وسلم فرشتوں سے محبت فرماتے تھے۔

احادیث مبارکہ کی روشنی میں

حضرت جبرائیل علیہ السلام سے خصوصی محبت: حضرت عائشہ صدیقہ رضی اللہ عنہا فرماتی ہیں کہ حضور صلی اللہ علیہ والہ وسلم نے فرمایا: ”حضرت جبرائیل علیہ السلام مجھ سے اس قدر محبت کرتے تھے کہ میں نے کبھی انہیں آتے جاتے بغیر سلام کے نہیں دیکھا۔“ [مسند امام احمد، ج: 6، ص: 117، الحدیث: 25143]

فرشتوں کی موجودگی کا احترام: حضور اکرم صلی اللہ علیہ والہ وسلم نے فرمایا: ”جس جگہ قرآن پڑھا جاتا ہے اور اللہ کا ذکر کیا جاتا ہے وہاں فرشتے حاضر ہوتے ہیں۔“ [صحیح البخاری، ج: 1، ص: 191، الحدیث: 501]

اس سے معلوم ہوتا ہے کہ حضور نبی کریم صلی اللہ علیہ والہ وسلم فرشتوں کی موجودگی کو پسند فرماتے تھے اور ایسی مجالس کو محبوب رکھتے تھے جہاں فرشتے آتے ہوں۔

معراج میں فرشتوں کا استقبال

فتاویٰ رضویہ میں امام احمد رضا خان بریلوی رحمۃ اللہ علیہ معراج کے باب میں لکھتے ہیں: ”شب معراج تمام ملائکہ صف بستہ استقبال کو نکلے، یہ حضور اکرم صلی اللہ علیہ والہ وسلم کی عظمت اور ملائکہ کے ساتھ خصوصی تعلق کا بین ثبوت ہے۔“ [فتاویٰ رضویہ، ج: 1، ص: 182]

اگر حضور صلی اللہ علیہ والہ وسلم فرشتوں سے محبت نہ فرماتے تو یہ عظیم الشان استقبال اور قرب ممکن نہ تھا۔

فرشتوں کے ادب کی تعلیم

لَّا یَعْصُوْنَ اللّٰهَ مَاۤ اَمَرَهُمْ

ترجمہ: وہ اللہ کی نافرمانی نہیں کرتے جو انہیں حکم دے۔ [التحریم: 6]

تفسیر نعیمی میں ہے: ”نبی کریم صلی اللہ علیہ والہ وسلم فرشتوں کی اطاعت، پاکیزگی اور عاجزی کو پسند فرماتے اور امت مسلمہ کو ان صفات کے اپنانے کا حکم دیتے، یہ محبت کی اعلیٰ علامت ہے۔“ [تفسیر نعیمی، ج: 18، ص: 145]

فرشتوں سے بغض کی مذمت

فتاویٰ جامی میں علامہ جامی رحمۃ اللہ علیہ نے فرمایا: ”ملائکہ سے بغض رکھنا کفر کے قریب ہے اور نبی کریم صلی اللہ علیہ والہ وسلم اس بغض سے پاک ہیں۔ بلکہ آپ صلی اللہ علیہ والہ وسلم محبت و تعظیم کا کامل نمونہ ہیں۔“ [فتاویٰ جامی، ج: 2، ص: 266]

حضور صلی اللہ علیہ والہ وسلم کی فرشتوں سے محبت کے مظاہر

1. حضرت جبرائیل علیہ السلام کا بار بار آنا۔
2. معراج کی رات فرشتوں کا شامل ہونا۔
3. فرشتوں کے ادب و مقام کا بیان۔
4. امت کو فرشتوں سے محبت اور احترام کی تعلیم۔

حضور نبی کریم صلی اللہ علیہ والہ وسلم کی فرشتوں سے محبت قرآن و حدیث سے ثابت، واضح اور روشن ثبوت ہے۔ آپ صلی اللہ علیہ والہ وسلم نہ صرف فرشتوں سے محبت فرماتے تھے بلکہ امت کو بھی ان سے محبت، ان کا احترام اور ان جیسے پاکیزہ اعمال اختیار کرنے کی تعلیم دیتے تھے۔ فرشتوں سے محبت دراصل اللہ اور اس کے رسول صلی اللہ علیہ والہ وسلم سے محبت کا مظہر ہے۔