| عنوان: | چاندِ محرم جاگتے دل |
|---|---|
| تحریر: | سفینہ الحفیظ |
| پیش کش: | نوائے قلم رضویہ اکیڈمی للبنات، مبارک پور |
محرم کا چاند نکلا دل جیسے خاموش ہو گیا، جیسے کوئی پرانی یاد پھر سے جاگ اُٹھی ہو۔ یہ چاند صرف مہینے کی شروعات نہیں، یہ کربلا کی قربانی کی یاد ہے جہاں سچائی نے جان دی، مگر جھکنا قبول نہ کیا۔ محرم کی یاد ہمیں بتاتی ہے کہ حق چاہے تنہا ہو، جیت اسی کی ہوتی ہے۔ ہم خوش نصیب ہیں کہ ہم حسین رضی اللہ تعالی عنہ کے قافلے کے وارث ہیں جنہوں نے دنیا کو سکھایا: سر کٹایا جا سکتا ہے، حق چھوڑا نہیں جا سکتا۔
محرم کا چاند جاگنے کا پیغام جب محرم کا چاند طلوع ہوتا ہے، تو صرف نیا مہینہ شروع نہیں ہوتا بلکہ دل کی دنیا میں ایک سوال اُبھرتا ہے۔ گویا کہ یہ چاند ہم سے کہتا ہے: تم نے حسین رضی اللہ تعالی عنہ کو کتنا پہچانا؟ کیا تم اُن کے راستے پر ہو؟یہ چاند صرف دیکھنے کی چیز نہیں، یہ روح کو جھنجھوڑنے والی صدا ہے، جو کہتی ہے: اُٹھو! سوچو! اپنے دل کو زندہ کرو!
محرم کی یاد ہم سے کیا چاہتی ہے؟ محرم کی یاد صرف آنسو نہیں مانگتی،یہ ہم سے صرف رسم و رواج نہیں مانگتی یہ تو ہمیں سوچنے، رکنے اور خود کو دیکھنے کا مطالبہ کرتی ہے۔ یہ ہم سے پوچھتی ہے: کیا تم نے دین کو بچانے کی کوئی فکر کی؟ کیا تم نے اپنی نماز، پردہ، زبان، اور کردار پر کبھی غور کیا؟ کیا تم نے نفس کی غلامی سے نکل کر اللہ کی بندگی کا راستہ اپنایا؟ محرم کی یاد ہمیں صرف ماضی نہیں سناتی، یہ ہمیں آج کے حال سے سوال کرنے پر مجبور کرتی ہے۔
جاگتے دلوں کا مہینہ
یہ مہینہ ان لوگوں کے لیے ہے جو صرف آنکھوں سے نہیں، دل سے روتے ہیں۔ جو صرف مجلس میں بیٹھنے والے نہیں، بلکہ حق پر چلنے والے بننا چاہتے ہیں۔ محرم کی یاد ہمیں بتاتی ہے کہ دین صرف کتابوں میں محفوظ نہیں ہوتا، قربانی سے، صبر سے، اور کردار سے زندہ رہتا ہے۔اور یہی سبق ہمیں کربلا کے کرداروں سے ملتا ہے
حضرت حسین رضی اللہ تعالی عنہ نے حق کے لیے جان دے دی مگر ظلم کے آگے سر نہ جھکایا۔ حضرت زینب رضی اللہ تعالی عنہا نے صبر کی وہ مثال قائم کی جو قیامت تک کے لیے عورتوں کا نمونہ بن گئی۔ حضرت علی اکبررضی اللہ تعالی عنہ نے جوانی قربان کی تاکہ دنیا سمجھے: محبت، وفا اور شہادت کیا ہوتی ہے۔ حضرت علی اصغر رضی اللہ تعالی عنہ کی پیاس، آج بھی امت کے ضمیر کو جھنجھوڑتی ہے کہ دین کے لیے ہر عمر کی قربانی قبول ہے۔
اور یہی قربانیوں کی داستان صرف ماضی کی بات نہیں، یہ آج بھی ہم سے کچھ مانگتی ہے۔ تو آئیے! ذرا رُک کر دیکھتے ہیں کہ آج ہمارا وقت کا یزید کون ہے؟ کہیں وہ ہمارے باہر نہیں، بلکہ ہمارے ہی اندر تو نہیں چھپا؟
وقت کا یزید اور ہماری آزمائش
ہم اکثر یزید کو باہر تلاش کرتے ہیں، جب کہ ہمارا نفس بھی وقت کا یزید ہو سکتا ہے۔ جو ہمیں سچ سے روکے، حق سے ہٹائے، اور دنیا کی لذتوں میں گم کر دے۔ قاریِ عزیز! کیا ہم اپنے نفس سے لڑ رہے ہیں؟ یا خاموشی سے اُس کے پیچھے چل رہے ہیں؟
ہماری محرم کی قربانی کیا ہوگی؟ محرم کی یاد ہم سے سوال کرتی ہے: کیا تم نے کبھی سوچا کہ یہ سب قربانیاں کیوں ہوئیں؟ کس مقصد کے لیے؟ جواب واضح ہے: دین کو بچانے کے لیے، نماز کو قائم رکھنے کے لیے، رسول ﷺ کی سنت کو زندہ رکھنے کے لیے، اور امت کو غفلت سے جگانے کے لیے۔ اگر وہ سب کچھ ہمارے لیے کیا گیا، تو کیا ہم نے بھی کچھ سوچا کہ ہم اپنے دین کے لیے کیا کر رہے ہیں؟
محرم کا چاند صرف رونے کے لیے نہیں محرم کا چاند ہمیں صرف آنکھوں سے نہیں، دل کی آنکھ سے دیکھنے کی دعوت دیتا ہے۔ یہ چاند ہمیں بلاتا ہے کہ ہم خود سے پوچھیں: کیا ہم حق کے ساتھ ہیں؟ کیا ہم نفس کے یزید سے لڑ رہے ہیں؟ کیا ہم اپنے بچوں کو دین کی محبت دے رہے ہیں؟ کیا ہماری زبان، لباس، نظریں اور نیت دین کی نمائندگی کرتی ہیں؟ اگر نہیں تو پھر محرم کی یاد کو صرف رسماً منانا، مقصد سے دوری ہے۔
محرم کی یاد صرف آنسو نہیں مانگتی، یہ سوچ، قربانی، اور حق پسندی مانگتی ہے۔ محرم کا چاند صرف آسمان پر نہیں چمکتا، بلکہ اُس دل میں چمکتا ہے، جو جاگتا ہے۔ آئیے! ہم بھی جاگتے دل بنیں تاکہ کربلا صرف ماضی نہ رہے، بلکہ ہماری زندگی کا راستہ بن جائے۔
یا اللہ! ہمیں وہی روشنی عطا فرما جو محرم کے چاند سے دلوں میں اُترتی ہے، ہمیں وہی قربانی کا جذبہ دے جو کربلا والوں کا تھا۔ ہمیں وقت کے یزید سے بچا، اور اپنے نفس کی غلامی سے آزاد کر دے۔ ہمیں زندہ دل عطا فرما جو جاگے، سمجھے، اور تیری راہ پر جم جائے۔ آمین یا رب العالمین۔
