بچپن مصطفیٰ صلی اللہ علیہ وسلم

عنوان:	بچپن مصطفیٰ صلی اللہ علیہ وسلم
تحریر:	سفینہ الحفیظ
پیش کش:	نوائے قلم رضویہ اکیڈمی للبنات، مبارک پور

سرورِ کائنات، فخرِ موجودات، محبوبِ ربِّ کائنات صلی اللہ تعالی علیہ وسلم کی حیاتِ طیبہ کا ہر لمحہ اہلِ ایمان کے لیے درسِ ہدایت اور خزانۂ برکت ہے۔ آپ صلی اللہ تعالی علیہ وسلم کی ولادت سے لے کر بچپن، جوانی اور بعثت تک ایک ایک مرحلہ معجزات سے بھرپور ہے۔ بچپن کے وہ منور لمحات جن میں آپ صلی اللہ تعالی علیہ وسلم کی شان و عظمت جھلکتی ہے، ایمان والوں کے دلوں میں محبت و عقیدت کو مزید مضبوط کرتے ہیں۔

حضرت عباس رضی اللہ عنہ فرماتے ہیں:

قَالَ العَبَّاسُ رَضِيَ اللَّهُ عَنْهُ: رَأَيْتُكَ فِي المَهْدِ تُخَاطِبُ القَمَرَ، فَيَهْبِطُ حَتَّى يَدْنُوَمِنْ إِصْبَعِكَ، فَتُشِيرُ إِلَيْهِ فَيَتَحَرَّكُ، فَتَضْحَكُ إِلَيْهِ فَيَضْحَكُ إِلَيْكَ۔ (الخصائص الكبرى: 42)

ترجمہ: میں نے آپ صلی اللہ تعالی علیہ وسلم کو جھولے میں چاند سے بات کرتے دیکھا، چاند آپ کی انگلی کی طرف جھکتا تھا، آپ اشارہ کرتے تو چاند حرکت کرتا، آپ مسکراتے تو وہ مسکراتا۔

لوحِ محفوظ کی آواز

حضرت عباس رضی اللہ عنہ نے عرض کیا: یا رسول اللہ! کیا آپ کو بچپن کے یہ واقعات یاد ہیں؟ آپ صلی اللہ تعالی علیہ وسلم نے فرمایا:

أَيُّهَا العَمُّ! هَذَا بَعْدَ وِلادَتِي، أَمَّا قَبْلُ فَإِنِّي كُنْتُ فِي بَطْنِ أُمِّي أَسْمَعُ صَوْتَ القَلَمِ يَكْتُبُ فِي اللَّوْحِ المَحفُوظِ، وَأَرَى أَعْمَالَ أُمَّتِي وَأَسْمَاءَهُمْ۔ (الخصائص الكبرى: 43)

ترجمہ: اے چچا! یہ تو پیدائش کے بعد کے واقعات ہیں، مگر اس سے پہلے جب میں اپنی ماں کے شکم میں تھا، میں لوحِ محفوظ پر قلم کی آواز سنتا تھا، اپنی امت کے اعمال اور ان کے نام دیکھتا تھا۔

سایہ کرنے والا بادل

حضرت حلیمہ سعدیہ رضی اللہ عنہا فرماتی ہیں:

وَاللَّهِ لَقَدْ رَأَيْتُ الغَمَامَةَ تُظَلِّلُهُ، إِذَا مَشَى سَارَتْ مَعَهُ، وَإِذَا وَقَفَ وَقَفَتْ، وَإِذَا قَعَدَ قَعَدَتْ۔ (مدارج النبوۃ: 112)

ترجمہ: اللہ کی قسم! میں نے دیکھا کہ ایک بادل آپ صلی اللہ تعالی علیہ وسلم پر سایہ کیے رہتا تھا۔ جب آپ چلتے وہ چلتا، رکنے پر وہ ٹھہرتا، اور بیٹھنے پر وہ بھی بیٹھ جاتا۔

برکتِ اطعام و شرب

حضرت ابو طالب کے گھر میں آپ صلی اللہ تعالی علیہ وسلم کے وجود سے برکت ہوتی۔ آپ صلی اللہ تعالی علیہ وسلم کے بغیر کھانے میں سب بھوکے رہتے، اور آپ صلی اللہ تعالی علیہ وسلم کے ساتھ کھانے پر سب سیر ہوتے اور کھانا بچ بھی جاتا۔

دودھ کا پیالہ جو ایک کے لیے کافی ہوتا، آپ صلی اللہ تعالی علیہ وسلم کے نوش فرمانے کے بعد پورے گھر کے لیے کافی ہو جاتا۔

قحط میں بارش کا معجزہ

جب مکہ میں قحط آیا، قریش حضرت ابو طالب کے پاس بارش کی دعا کے لیے آئے۔ ابو طالب آپ صلی اللہ تعالی علیہ وسلم کو کعبہ شریف لائے، آپ کی پشت مبارک کو کعبہ کی دیوار سے لگایا، اور آپ صلی اللہ تعالی علیہ وسلم نے آسمان کی طرف اشارہ فرمایا:

فَأَشَارَ بِإِصْبَعِهِ نَحْوَ السَّمَاءِ، فَاجْتَمَعَتِ السَّحَابَاتُ وَأَمْطَرَتْ۔ (السيرة النبویة: 87)

ترجمہ: آپ صلی اللہ تعالی علیہ وسلم نے اپنی انگلی سے آسمان کی طرف اشارہ فرمایا، فوراً بادل جمع ہوئے اور بارش ہونے لگی۔

اللہ اللہ وہ بچپنے کی پھبن اس خدا بھاتی صورت پہ لاکھوں سلام ہم غریبوں کی آنکھوں پہ بے حدود ہم فقیروں کے ثروت پہ لاکھوں سلام

اللَّهُمَّ اجْعَلْنَا مِنْ أَحِبَّائِهِ، وَاحْشُرْنَا فِي زُمْرَتِهِ، وَاسْقِنَا مِنْ يَدِهِ الشَّرِيفَةِ شَرْبَةً هَنِيئَةً لَا نَظْمَأُ بَعْدَهَا أَبَدًا۔

اے اللہ! ہمیں اپنے محبوب صلی اللہ تعالی علیہ وسلم کے محبوبوں میں شامل فرما، اور ہمیں ان کی جماعت میں اٹھا، اور ہمیں ان کے مبارک ہاتھ سے ایسی خوشگوار گھونٹ حوضِ کوثر سے پلا جو کبھی نہ ختم ہو، اور جس کے بعد ہمیں کبھی پیاس نہ لگے۔ آمین یا رب العالمین