| عنوان: | چار روزہ فقہی سیمینار کی ایک جھلک (قسط: اول) |
|---|---|
| تحریر: | حضرت مولانا محمد احمد صاحب مصباحی |
| پیش کش: | عرشیہ بانو عطاریہ |
| منجانب: | امجدی گلوبل اکیڈمی |
اسلامی شریعت ہر شعبہ زندگی میں رہنمائی کی ضامن ہے اور ہر دور میں اس نے یہ فریضہ انجام دیا ہے۔ اگرچہ زمانہ کے انقلابات اور نت نئی ایجادات کے ساتھ گوناگوں اور پیچیدہ سوالات پیدا ہوتے رہے ہیں، مگر علمائے اسلام نے اپنی فقیہانہ بالغ نظری سے ہمیشہ ان کا حل تلاش کیا ہے۔ یہ کوئی آسان کام نہیں جس سے ہر عالم عہدہ برآ ہو سکے۔ اس کے لیے حالاتِ زمانہ پر گہری نظر، اشیائے جدیدہ سے متعلق عمیق مطالعہ، پھر شریعتِ اسلامیہ کے اصول و فروع سے پوری واقفیت، کمال استحضار، قدرتِ استخراج اور قوتِ فیصلہ کی ضرورت ہے۔
اعلیٰ حضرت امام احمد رضا قدس سرہ اپنے گوناگوں علوم و فنون کی بنا پر تنہا ایک ایسی اکیڈمی کی حیثیت رکھتے تھے کہ ان کی بارگاہ میں جو سوال پیش ہوتا، اس کا ایسا تنقیح شدہ جواب عطا فرماتے کہ کسی صاحبِ نظر کے لیے مجالِ اختلاف باقی نہ رہتی۔
مجلسِ شرعی کا قیام
آج جبکہ نئے مسائل روز بروز پیش آتے رہتے ہیں اور ایسی جامع ہستیاں ہمارے درمیان ناپید ہیں، ضرورت اس بات کی ہے کہ مختلف ماہرین مل کر مسائل کو واشگاف کریں اور ان کا ایسا علمی و شرعی حل قوم کے سامنے پیش کریں جس میں شک و تردّد کی گنجائش باقی نہ رہے۔ اسی ضرورت کے پیشِ نظر دارالعلوم اشرفیہ مبارکپور کی مجلسِ شوریٰ نے فیصلہ کیا اور 19 دسمبر 1992ء کو علمائے اشرفیہ کی ایک میٹنگ میں "مجلسِ شرعی" کا قیام عمل میں آیا۔
اس مجلس نے ابتدائی طور پر سیمینار کے لیے تین اہم مسائل کا انتخاب کیا:
- انگریزی دواؤں کا حکم۔
- زندگی بیمہ (Life Insurance) اور عام بیمہ (General Insurance) کے احکام۔
- مشترکہ سرمایہ کمپنی (Joint Stock Company) میں شرکت اور اس کے حصوں کی خریداری۔
سیمینار کی اجمالی رپورٹ (اجلاس وار)
یہ سیمینار چھ خصوصی نشستوں اور ایک جلسہ عام پر مشتمل تھا:
- پہلا اجلاس: 18 اکتوبر 1993ء کو فقیہِ عصر حضرت علامہ مفتی محمد شریف الحق صاحب امجدی کی صدارت میں منعقد ہوا۔ اس اجلاس میں انگریزی دواؤں سے متعلق مقالات پڑھے گئے۔
- دوسرا اجلاس: 19 اکتوبر 1993ء کو حضرت علامہ مفتی عبد المنان اعظمی کی صدارت میں ہوا، جس میں انگریزی دواؤں پر بحث و مباحثہ کیا گیا۔
- تیسرا اجلاس: 19 اکتوبر 1993ء کو حضرت مولانا سید ظہیر احمد زیدی کی صدارت میں "انشورنس" کے موضوع پر منعقد ہوا۔
- چوتھا اجلاس: 20 اکتوبر 1993ء کو حضرت مولانا مفتی جلال الدین احمد امجدی کی صدارت میں ہوا۔ اس نشست میں انشورنس سے متعلق مزید مباحثے ہوئے۔
- پانچواں اجلاس: 20 اکتوبر 1993ء کو عزیزِ ملت حضرت مولانا عبد الحفیظ صاحب کی صدارت میں "مشترکہ سرمایہ کمپنی" کے موضوع پر منعقد ہوا۔
- چھٹا اجلاس: 21 اکتوبر 1993ء کو حضور تاج الشریعہ حضرت علامہ اختر رضا خاں ازہری کی صدارت میں منعقد ہوا، جس میں فیصلہ بورڈ کا قیام عمل میں آیا جس کے صدر خود حضور تاج الشریعہ منتخب ہوئے۔
اجلاسِ عام
21 اکتوبر 1993ء کو حضور تاج الشریعہ کی صدارت میں ایک جلسہ عام ہوا جس میں ملک بھر سے آئے ہوئے علمائے کرام اور مندوبین نے شرکت کی۔ اس اجلاس میں مجلسِ شرعی کی اہمیت اور افادیت پر روشنی ڈالی گئی اور مندوبین نے اپنے تاثرات پیش کیے۔ تمام علمائے کرام نے دارالعلوم اشرفیہ مبارکپور کی اس کاوش کو سراہا اور اسے وقت کی اہم ضرورت قرار دیا۔
