اپنی شخصیت سنواریں!

عنوان:	اپنی شخصیت سنواریں!
تحریر:	عمران رضا عطاری مدنی
پیش کش:	مجمع التصانیف

اپنی شخصیت سنواریں!

صرف ظاہری صورت میں اچھا دکھائی دینا کافی نہیں، بلکہ اصل خوبی یہ ہے کہ انسان حسنِ اخلاق (Good Manners) اور عمدہ کردار (Good Character) کا مالک ہو، دوسروں کے لیے فائدہ مند (Beneficial) ہو اور اس کے وجود سے کسی کو تکلیف نہ پہنچے۔ ایک اچھی شخصیت (Good Personality) وہ ہے جس کے ظاہر میں صفائی و سلیقہ (Grooming) اور باطن میں اچھے اخلاق و کردار نظر آئیں۔ اپنی شخصیت کو سنوارنے کے لیے درج ذیل امور پر توجہ دیں:

❶ حسنِ اخلاق (Good Manners)

اپنی شخصیت کو حسنِ اخلاق کا پیکر بنائیں، مثلاً:

• لوگوں سے مسکرا کر اور اچھے انداز سے ملاقات کریں۔

• اپنے وجود سے کسی کو تکلیف نہ پہنچائیں۔

• اگر کسی سے تکلیف پہنچے تو اسے معاف کر دیں۔

• لوگوں سے محبت کے ساتھ سلام، دعا اور خیر خیریت کا سلسلہ جاری رکھیں۔

• لوگوں کی خوشی اور غمی میں شریک ہوں۔

حضورِ اکرم ﷺ نے حسنِ اخلاق کی عظمت بیان کرتے ہوئے ارشاد فرمایا:

مَا مِنْ شَيْءٍ يُوضَعُ فِي الْمِيزَانِ أَثْقَلُ مِنْ حُسْنِ الْخُلُقِ.

”قیامت کے دن بندۂ مؤمن کے میزانِ عمل میں حسنِ اخلاق سے زیادہ وزنی کوئی عمل نہیں ہوگا۔“ (سنن ترمذی، ۳/۵۳۶، حدیث: ۲۰۰۳)

❷ اچھے اور صاف ستھرے کپڑے پہنیں (Good Dressing)

اچھے، صاف ستھرے اور سلیقے سے استری کیے ہوئے کپڑے پہنیں۔ لباس کا رنگ اور انداز ایسا ہو جو علما و صلحا کے درمیان رائج ہو۔ لباس (Dress) انسان کی شخصیت کا اہم تعارف (First Impression) ہوتا ہے، اس لیے لباس صاف ستھرا، باوقار (Decent) اور خوب صورت ہونا چاہیے۔

❸ کثرت سے خوشبو استعمال کریں (Perfume)

کثرت سے خوشبو استعمال کریں، کیوں کہ خوشبو لگانا سنت ہے اور اس کے دنیوی فوائد بھی ہیں۔ لوگ بھی اچھی خوشبو پسند کرتے ہیں۔ اگر آپ کے کپڑوں یا جسم سے ناگوار بو آئے گی تو لوگ بدظن اور دور ہوں گے۔ اس لیے خوشبو (Perfume) پر کچھ رقم خرچ کریں اور عمدہ خوشبو استعمال کریں۔

❹ صفائی ستھرائی کا اہتمام کریں (Cleanliness)

صرف لباس ہی نہیں بلکہ اپنے جسم، بالوں، ناخن اور داڑھی وغیرہ کی صفائی ستھرائی کا بھی خاص اہتمام کریں۔ صفائی (Cleanliness) ایک اچھی شخصیت کی بنیادی ضرورت ہے۔

حضورِ اکرم ﷺ کی تعلیمات میں پاکیزگی کی بڑی اہمیت ہے۔ حدیثِ پاک میں ہے:

إِنَّ اللهَ تَعَالَى يُحِبُّ النَّاسِكَ النَّظِيفَ.

”بے شک اللہ تعالیٰ پاکیزہ اور صاف ستھرا رہنے والے عبادت گزار کو پسند فرماتا ہے۔“ (جامع الاحادیث، ۸/۲۴۲، حدیث: ۷۲۲۰)

ناخن، سر اور داڑھی کے بالوں کا خیال و لحاظ بھی ضروری ہے، ان کی صفائی ستھرائی کا اہتمام لازم ہے۔ امام غزالی شافعی رحمۃ اللہ علیہ فرماتے ہیں: ”بالوں کو بکھرا ہوا رکھنا مکروہ ہے۔“ (لباب الاحیاء، ص: ۵۷)

❺ اچھے اور عمدہ جوتے پہنیں (Good Shoes)

جوتے بھی اچھے اور عمدہ قسم کے پہنیں۔ بالخصوص علما اور طلبہ کو اپنے جوتوں کی صفائی اور سلیقے کا خاص خیال رکھنا چاہیے۔ صاف ستھرے جوتے (Shoes) بھی مجموعی شخصیت (Overall Personality) کے حسن میں اضافہ کرتے ہیں۔

❻ قلم ساتھ رکھیں (Pen)

آپ کے کرتے کی اوپری جیب میں ہمیشہ ایک قلم (Pen) ہونا چاہیے۔ اس سے جہاں شخصیت کی خوب صورتی اور سنجیدگی میں اضافہ ہوگا، وہیں اس کا اصل فائدہ یہ ہے کہ ضرورت کے وقت کوئی اہم بات، نکتہ یا کام فوراً نوٹ (Note) کیا جا سکے گا۔

❼ اچھی گھڑی پہنیں (Watch)

آپ کے ہاتھ میں عمدہ اور اچھی کوالٹی کی گھڑی (Watch) ہونی چاہیے۔ پروفیشنل (Professional) اور باوقار لوگوں کے ہاتھوں میں گھڑی نظر آتی ہے۔ خود مرشدِ گرامی امیرِ اہلِ سنت بھی گھڑی پہنتے ہیں۔ گھڑی وقت دیکھنے میں کافی مدد دیتی ہے اور انسان بہت سے کام وقت پر انجام دے لیتا ہے۔ وقت کی پابندی (Punctuality) ایک منظم (Organized) اور کامیاب شخصیت کی علامت ہے۔

❽ صاف ستھرا عمامہ یا ٹوپی پہنیں (Turban / Cap)

سر پر اچھا اور عمدہ عمامہ یا ٹوپی ہو، جو دھلی ہوئی، صاف ستھری اور خوب صورت ہو۔ سر کا حلیہ (Appearance) بھی شخصیت کا اہم حصہ ہے، اس لیے عمامہ یا ٹوپی صاف ستھری اور سلیقے سے ہونی چاہیے۔

محترم قارئین!

اچھی شخصیت (Good Personality) صرف ظاہری حُسن، عمدہ لباس یا خوب صورت حلیے کا نام نہیں، بلکہ اصل خوب صورتی حسنِ اخلاق (Good Manners)، پاکیزگی (Cleanliness)، عمدہ کردار (Good Character)، سلیقے (Grooming) اور وقت کی پابندی (Punctuality) میں ہے۔ انسان کا ظاہر بھی صاف ستھرا ہو اور باطن بھی اچھا ہو، یہی مکمل شخصیت (Complete Personality) کی پہچان ہے۔

اپنی شخصیت کو اس انداز میں سنواریں کہ لوگ آپ کے لباس (Dress) اور حلیے سے متاثر ہونے کے ساتھ آپ کے اخلاق (Character) سے محبت بھی کریں۔ آپ کی ظاہری صفائی (Cleanliness) کے ساتھ کردار کی پاکیزگی بھی نظر آئے اور آپ کا وجود دوسروں کے لیے فائدہ مند (Beneficial) ثابت ہو۔ یاد رکھیں! بہترین شخصیت وہ ہے جس کے ظاہر سے وقار (Dignity) اور باطن سے اخلاص (Sincerity) جھلکے۔

عمران رضا عطاری مدنی (بنارس)