وباؤں کا روحانی قلعہ درود شریف

عنوان:	وباؤں کا روحانی قلعہ درود شریف
تحریر:	سلمی شاھین امجدی کردار فاطمی
پیش کش:	نوائے قلم رضویہ اکیڈمی للبنات، مبارک پور

دلوں کو چھو لینے والی پکار ایک تاریک رات میں جب ہر طرف خوف اور بے یقینی کا راج ہو، جب بیماریاں اور آفات چاروں طرف رقص کرتی ہوں، تب دل کی گہرائیوں سے ایک ہی صدا نکلتی ہے: یا اللہ! ہمیں بچا لے!

اسی لمحے دل کو قرار آتا ہے جب نبی کریم ﷺ کی رحمت بھری آواز گونجتی ہے: جو شخص مجھ پر کثرت سے درود بھیجے گا، اللہ تعالیٰ اس کی پریشانیاں دور فرمائے گا، گناہوں کو معاف کرے گا اور اس کے دل کو سکون عطا فرمائے گا (فضائل درود: ص ١٢٤)

یہ وہ حقیقت ہے جسے امام ابن حجر نے خوب صورت الفاظ میں یوں بیان کیا: نبی کریم ﷺ پر کثرت سے درود بھیجنا، وباؤں اور دیگر بڑی مصیبتوں کے خاتمے کا بہت بڑا سبب ہے۔ (الماعون: ص ٣٣٣)

درود شریف کا روحانی راز

اگر ہم درود شریف کو صرف ایک وظیفہ سمجھ کر پڑھیں، تو شاید اس کے کمالات ظاہر نہ ہوں۔ اس کے لیے درود شریف کو محبت اور عقیدت کے جام میں گھول کر پینا ہوگا۔ اعلیٰ حضرت امام احمد رضا خان بریلوی فرماتے ہیں:

درود شریف محض ذکر نہیں بلکہ ایمان کی حفاظت کا قفل ہے، مصیبتوں کا حصار ہے، اور وباؤں کا قلعہ ہے۔ (فتاویٰ رضویہ، جلد ٢٤، صفحہ ٤٤٣)

اللہ تعالیٰ فرماتا ہے:

إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا (الاحزاب: ٥٦)

ترجمہ کنزالایمان: بیشک اللہ اور اس کے فرشتے درود بھیجتے ہیں اس غیب بتانے والے (نبی) پر اے ایمان والوان پر درود اور خوب سلام بھیجو۔

یہ حکم محض رسمی نہیں بلکہ دراصل اہل ایمان کے لیے وباؤں اور مصیبتوں سے بچاؤ کا راز ہے۔ تاریخ گواہ ہے کہ جب بھی وبائیں پھیلیں، اہلِ ایمان نے درود شریف کو بطور روحانی ڈھال استعمال کیا۔

جب شام میں طاعون پھیلا تو حضرت معاذ بن جبل اور دیگر صحابہ درود شریف کا ورد کرتے، اور ایمان کی مضبوطی کے ساتھ اللہ سے دعا کرتے۔ بغداد میں جب قحط پڑا، امام نووی نے لوگوں کو درود شریف کی تلقین فرمائی، جس سے حالات بہتر ہونے لگے۔

ماہرین نفسیات اس بات پر متفق ہیں کہ ذکر (Mindfulness) انسان کو ذہنی دباؤ، ڈپریشن، اور دیگر بیماریوں سے محفوظ رکھتا ہے۔ درود شریف چوں کہ سب سے اعلیٰ ذکر ہے، اس لیے یہ روحانی بیماریوں کے ساتھ جسمانی بیماریوں کے خلاف بھی ڈھال بنتا ہے۔

قارئین کے لیے پیغام

پیارے قارئین! آج کے دور میں جب وبائیں ہمیں گھیرے ہوئے ہیں، آئیے درود شریف کی طاقت کو پہچانیں۔ یہ محض الفاظ نہیں بلکہ رسول اللہ ﷺ کی محبت کا پروانہ ہے۔ روزانہ کم از کم ١٠٠ بار درود شریف پڑھیں۔ ہر مصیبت کے وقت درود شریف کو اپنا ہتھیار بنائیں۔ درود شریف پڑھ کر اپنے گناہوں کی معافی طلب کریں، کہ گناہوں کی وجہ سے بھی مصیبتیں آتی ہیں۔

درود شریف کو اپنا ساتھی بناؤ، یہی وہ سفینہ ہے جو مصیبتوں کے طوفان سے بچا سکتا ہے۔ کیا آپ اس راز کو اپنائیں گے؟