| عنوان: | اعلیٰ حضرت ہیں کون؟ |
|---|---|
| تحریر: | فرمان المصطفیٰ نظامی حسینی حنفی |
| پیش کش: | جامعۃ المدینہ فیضان مفتی اعظم، شاہ جہان پور |
ولادت با سعادت:
اعلیٰ حضرت مجدد دین و ملت الشاہ امام احمد رضا خان فاضل بریلوی رضی اللہ عنہ کی ولادت با سعادت 10 شوال المکرم 1272ھ بمطابق 14 جون 1856ء بوقت ظہر محلہ جسولی شہر بریلی شریف میں ہوئی۔
آپ رحمۃ اللہ علیہ کا پیدائشی نام ”محمد“ اور تاریخی نام ”المختار“ ہے۔ آپ کی والدہ ماجدہ محبت میں ”امن میاں“ فرمایا کرتی تھیں، والد ماجد اور دیگر لوگ ”احمد میاں“ کے نام سے پکارا کرتے تھے۔ آپ کے جد امجد نے آپ کا اسم گرامی احمد رضا رکھا۔
آپ فی نفسہ (بذات خود) اپنے نام سے پہلے ”عبد المصطفیٰ“ لکھا کرتے تھے، اس سے آپ رحمۃ اللہ علیہ کی آقا علیٰ نبینا علیہ الصلوٰۃ والسلام سے سچی الفت و محبت اور غلامی کا اندازہ ہوتا ہے، جس کو آپ نے حدائقِ بخشش میں یوں فرمایا:
خوف نہ رکھ رضا ذرا تو تو ہے عبدِ مصطفیٰ
تیرے لیے امان ہے تیرے لیے امان ہے
اعلیٰ حضرت ہیں کون؟
اعلیٰ حضرت ایسی ویسی شخصیت کا نام نہیں، بلکہ وہ ایک ایسی ذات ہیں جس نے 13 سال 10 ماہ چار دن کی عمر میں تمام مروجہ علوم کی تکمیل اپنے والد ماجد رئیس المتکلمین الشاہ مولانا نقی علی خان صاحب سے حاصل کر کے سند فراغت حاصل کر لینے کے بعد اسی دن آپ نے پہلا فتویٰ تحریر فرمایا۔ آپ نے حالت بیداری میں دیدار مصطفیٰ کا شرف حاصل کیا، آپ کو تقریباً 70 علوم، علوم جفر، علوم ریاضی، علم توقیت اور تمام سائنسی علوم عقلیہ اور نقلیہ پر مہارت حاصل تھی۔
وہ مرد قلندر، وہ مرد مجاہد جس نے ہر جگہ پر گستاخ رسول، گستاخ صحابہ، گستاخ اولیا اور اکابرین امت کے گستاخوں کا ڈٹ کر مقابلہ کیا۔ کم و بیش جس نے 50 علوم میں قلم اٹھایا، مختلف عنوانات پر ایک ہزار سے زائد کتابیں تصنیف فرمائیں، کنز الایمان ایسا عظیم ترجمہ عطا فرمایا۔ جس بستی کے نام سے حق و باطل کی پہچان ہو جائے، دن کا سورج اور رات کے تارے دیکھ کر گھڑی کا صحیح وقت ملا لے، اسے اعلیٰ حضرت کہتے ہیں۔ اب پھر سوال نہ کرنا کہ اعلیٰ حضرت ہیں کون؟ کیا ہیں اعلیٰ حضرت؟
تو نے باطل کو مٹایا اے امام احمد رضا
دین کا ڈنکا بجایا اے امام احمد رضا
اہل سنت کا چمن اجڑا ہوا ویران تھا
کھل اٹھا تو جب کہ آیا اے امام احمد رضا
