| عنوان: | امام احمد رضا اور علم عقائد و کلام |
|---|---|
| تحریر: | فیضان المصطفیٰ قادری |
| پیش کش: | مہر تاج |
| منجانب: | اقراء القرآن اکیڈمی |
انکارِ خدا اور منکرینِ خدا کی حقیقت
بظاہر یہ سمجھا جاتا ہے کہ کافروں کے سیکڑوں فرقے اللہ تعالیٰ کو مانتے ہیں۔ فلاسفہ توحید پر دلائل دیتے ہیں، یہود و نصاریٰ اور مجوسی اپنے گمان میں اسی کا کلام مانتے ہیں، آریہ اور ہنود بھی سارے جہان کا مالک ایک ہی خدا کو مانتے ہیں، اور مشرکینِ عرب بھی بتوں کو خدا تک پہنچنے کا وسیلہ قرار دیتے تھے۔ اسی طرح کلمہ گو فرقوں میں جو مرتد ہیں (جیسے قادیانی، نیچری، چکڑالوی، وہابی، رافضی، دیوبندی، غیر مقلد) وہ بھی قرآن و حدیث کی سند لاتے ہیں۔ تو پھر یہ کیسے کہا جائے کہ یہ لوگ اللہ کو نہیں جانتے؟
اعلیٰ حضرت امام احمد رضا قدس سرہ نے اپنے مستقل رسالے میں اس عقدے کو حل کرتے ہوئے منطق کا ایک اصول بیان فرمایا ہے کہ کسی چیز کی نفی (سلب) کے تین طریقے ہوتے ہیں:
-
وجود سے مکمل انکار: یعنی سرے سے اس شے کی ہی نفی کر دی جائے (جیسے دہریہ وجودِ باری تعالیٰ کا انکاری ہے)۔
-
لوازمات کی نفی: شے کا نام لے مگر اس کی بنیادی اور لازمی صفات کا انکار کر دے۔
-
منافیات کا اثبات: شے کا نام لے کر اس میں وہ صفات ثابت کرے جو اس شے کی حقیقت کے صریح خلاف ہوں۔
آخری دونوں صورتوں میں انسان اگرچہ نام لیتا ہے مگر حقیقت میں وہ اس کا انکار کر رہا ہوتا ہے۔ اللہ رب العزت کی ذات کے لیے جمیع صفاتِ کمال لازم ہیں اور تمام عیوب و نقائص محال ہیں۔ مندرجہ بالا تمام فرقے اگرچہ خدا کا نام لیتے ہیں، لیکن وہ اس ذاتِ پاک کی صفات کا انکار کر کے یا اس میں عیوب ثابت کر کے درحقیقت ”منکرینِ خدا“ ہی ہیں۔ آپ نے مختلف فرقوں کے خود ساختہ تصورِ خدا کی یوں نقاب کشائی فرمائی:
-
فلاسفہ کا خدا: جو جزئیات سے جاہل اور اپنے افعال میں مجبور ہے۔
-
آریہ اور مجوس کا خدا: آریہ کے نزدیک ایشر کے برابر دو اور واجب الوجود ہیں، جبکہ مجوس کا خدا (یزداں) شیطان سے محاذ آرائی میں مجبور و بے بس ہے۔
-
یہود و نصاریٰ کا خدا: یہود کے نزدیک خدا تھک کر لیٹ جاتا ہے اور روتا ہے، جبکہ نصاریٰ کے نزدیک وہ اپنے اکلوتے کو سولی سے نہ بچا سکا۔
-
نیچری اور چکڑالوی کا خدا: نیچریوں کا خدا نیچر کے خلاف کچھ نہیں کر سکتا، جبکہ چکڑالوی کے ہاں اس کے رسول کی حیثیت ایک ڈاکینے سے زیادہ نہیں۔
-
قادیانی اور رافضی کا خدا: قادیانی کا خدا جھوٹوں کو نبی بناتا ہے اور اس کی آیات لہو و لعب ہیں۔ رافضیوں کا خدا مصلحت سے جاہل، حکم دے کر پچھتانے والا اور بندوں کے سامنے عاجز ہے۔
-
وہابی، دیوبندی اور غیر مقلدین کا خدا: وہابی اور دیوبندی کا تصورِ خدا ایسا ہے جو جھوٹ بول سکتا ہے، جس کا علم شیطان کے علم سے کم ہے، اور جس پر عیوب اور نقائص (جہل، سونا، بھولنا) کا اطلاق ممکن ہے۔ غیر مقلدین کا خدا ائمہ دین کی تقلید کو شرک اور عام مشرکوں کو خیر امت ٹھہراتا ہے۔
اعلیٰ حضرت ان تمام باطل تصورات کو بیان کرنے کے بعد ہر ایک پر یہی تبصرہ فرماتے ہیں: ”کیا انھوں نے خدا کو جانا؟ حاش لله، سبحان رب العرش عما یصفون!“
